In total darkness... Poetry is there for you

Category Urdu Poetry

Be-Tahzeeb

Hawa mein aahistagi milane lage hain
Haath se shama bhujane lage hain

Chal basa tha dariya mein doob kar
Ye kis ka janaza uthane lage hain

Aadhe Adhoore Jazbaat

Apni shiddat ko hawaon mein zam kar dein
Is toofan-e-mohabbat ko mausam kar dein

Parwane ko nahin pata anjaam-e-sitam*
Kuch shama ki roshni maddham kar dein

Arziyan Teri Meri

Itna to yaar mere mujh par karam kar dein
Dil ki nakamiyon ko mohtaram kar dein

Khudaya us par jaan nissar jab ho jaye
Ye maqsad-e-hayat phir khatam kar dein

Talaash-e-musalsal

Nakhl-e-sehra nahin saraabon ko dhoondhte hain
Hum jannat mein reh kar kharabon ko dhoondhte hain

Purani aadat hai ya ek adaa, koi kya jaane
Woh sukoon-e-dil mein aazabon ko dhoondhte hain

Berang Aankhein

Jism ko rooh bipharne ka faayda kya hai
Aag ko dhuan ubharne ka faayda kya hai

Kar ke hisse ye dard kam na hoga
Tu toota hai to bikharne ka faayda kya hai

Toote Raaste

Chhalke ke ashq be-sabab gaye hain
Ye tumhare dard bahut be-adab gaye hain

Jaam-e-khaali se na pooch matlab khuda ka
Yaad nahin hosh mein masjid kab gaye hain

Kuch hua hi nahin

Dushman-e-jaan koi bana hi nahin
Itne hum laiq-e-jafa hi nahin

Aazma lo ki dil ko chain aae
Ye na kahna kahin wafa hi nahin

Kaisa dil aur kya gam

Kaisa dil aur us ke kya gam ji
Yun hi bas baatein banate hain hum ji

Us se ab kpi baat kya karna
Khud se bhi baatein karte hain kam ji

Kar liya kya?

Bahut katra rahe ho saqi se
Gunah-e-tarq-e-baada kar liya kya

Yahan ke log kab ke ja chuke
Safar bahut zyada kar liya kya

Baees Baras

Mere aks-e-aaine ki pehchaan bata do
Ya fir ye maghloot aaine hata do
Baaees baras purani kuch tasveerein hai
Un tasveeron ko hi ghar mein laga do

« Older posts

© 2020 Zullmat — Powered by WordPress

Theme by Anders NorenUp ↑