Dushman-e-jaan koi bana hi nahin
Itne hum laiq-e-jafa hi nahin

(Dushman-e-jaan: enemy of heart, laiq-e-jafa: worthy of hatered)

Aazma lo ki dil ko chain aae
Ye na kahna kahin wafa hi nahin

Hum pashiman hain wo bhi hairan hain
Aisa tufan kabhi utha hi nahin

(pashiman: penitant/ ashamed)

Jaane kyun un se milte rahte hain
Khush wo kya honge jab khafa hi nahin

Tum ne ek dastan bana dali
Hum ne to raaz-e-gham kaha hi nahin

Gham-gusar is tarah se milte hain
Jaise duniya mein kuchh hua hi nahin

(gham-gusar: one who comforts in hardships)

Ai junun kaun si ye manzil hai
Kya karen kuchh hamein pata hi nahin

Maut ke din qarib aa pahunche
Hae hum ne to kuchh kiya hi nahin

Written by: Baqar Mehdi