Lutf wo ishq mein pae hain ki ji jaanta hai
Ranj bhi aise uthae hain ki ji jaanta hai
(ranj: sorrow)

Jo zamane ke sitam hain wo zamana jaane
Tu ne dil itne satae hain ki ji jaanta hai

Tum nahin jaante ab tak ye tumhaare andaz
Wo mere dil mein samae hain ki ji jaanta hai

Inhin qadmon ne tumhaare inhin qadmon ki qasam
Khak mein itne milae hain ki ji jaanta hai

Dosti mein teri dar-parda hamare dushman
Is qadar apne parae hain ki ji jaanta hai
(dar-parda: behind curtains)

Muskurate hue wo majma-e-agyaar ke sath
Aaj yun bazm main aaye hain ki ji janta hai
(majma-e-agyaar: Gathering of rivals or strangers)

Sadgi baankpan aghmaz shararat shokhi,
Tune andaz woh paye hain ki jee janta hai
(baankpan: smartness, aghmaz: to condone)

Kaaba-o-dair mein pathra gayeen dono aankhain
Aisay jalway nazar aaye hain ki jee jaanta hai

Daagh-e-waarafta ko ham aaj tere kooche se
Is tarah kheench ke laaye hain ki ji jaanta hai
(daagh-e-waarafta: Dagh – who is a wanderer)

Written by Dagh Dehlvi