Jo tukde ho jaate insaani zahan* ke
Mere hisse aate kitne hisse tere
Samjhana hai aasan par jaane de
(zahan: mind/ thoughts)

Main sochta hoon kya kahoon
Aur shayad tum sochti ho kya karoon
Yeah kaisi bisaat bichha rakhi hai
Na koi mohra, na chaal, na jeet na haar
Phir bhi kyun dil musir* hai khelne ko
Samjhana hai aasan par jaane de
(musir: adamant)

Ankhon mein yun soorma laga rakha hai
Mano shamma* ko fanoos* ne qaid rakha hai
Kakulein* tumhari jaise bey inteha raatein
Sadiyon se sanwar rahin hai sehar ki liye
Par jab ye nazarein, ye zulfein nahin mere liye
Tumhare lab, lafz aur zubaan nahin mere liye
Phir kyun hai dil-e-muztar* ko arzoo-e-deedar*
Ise samjhana hai aasan par jaane de
(shamma: flame, fanoos: lantern, kakulein: locks of hair, dil-e-muztar: anxious heart, arzoo-e-deedar: desire or seeing)

Itifaqan to nahin thi hamaari mulaqat
To sawal yeah bhi ki hum mile kyun
Tum qous-o-qazah* ka har ek rang
Main be-noor* duniya ki ek lams*
Tujhe dekhne dikhane se shagaf*
Mujh andhe ko ek chhuan ki talaash
Shayad behtar hota ki hum milein na hote
Samjhana hai aasan par jaane de
(qous-o-qazah: rainbow, be-noor: without light, lams: sense of touch, shagaf: interest)

Aur ab in bache kuche marasim* ka kya karein
Adhoore qissein hon to safah* phaad dein
Daraar padhi ho to deewar gira dein
Par yeah khayal dhund se ban gaye hain
Is dhund ko basa lein, ya is mein kho jaayein
Samjhana hai aasan par jaane de
(marasim: past, safah: page)

Kisi aur soorat kisi aur naam mein
Kisi aur din kisi aur shaam mein
Humse poochte jo tum, jaane kya kya kehte
Tujhe samjhaanaa hai aasan par jaane de
Tujhe samjhaanaa hai aasan par jaane de

by Aadil | #aadilsink